Es ist gar manchmal ein seltsam Ding,
oft unscheinbar ---> ein Internetschreiberling.

Eines gleich vorneweg, ich schreibs auch ganz ehrlich,
vorm Aldi seim PC war der Zugang zum Netz ä bißje beschwerlich.

Verkehrt war dess nitt, mer musses so sache,
wer do so alles schreibt, es ist eine Plache:

Do gibbt es die Schobs, die Große die Kleine,
kannst alles dort kaafe, mit de nötische Scheine...

Dann die Haapeees, vum Hondwerker samt Sohne,
Macht Werbung fers Geschefft, ob sichs dut lohne?
Guck doch liewer in die gelbe Seite, do findste se aach, aus de eigene Breite.
Mußt am End nitt bezahle die Ofahrt und so
wenn du nur hosst e verstobbtes Klo.
Kriehst ach ko Rechnung in schwindelnde Höh,
die der eh dut kuriern ach grad jed Diarö...

Unn donn findste im Internet
mei Lieblingszeuch, die Bleck...
Dort werd iwwer alles mechlische geschriebe,
alles werd zum Thema, iss klar.
Jeder konn schreibwe wie es ihm gefällt,
iwwers wischtische unn unwischtische uff dieser Welt.

Ich liebe die Strickbloggs, werklisch wahr.
Ich duhn gern lese was mancher so strickt,
wie ers gemacht hott, monchmo geschickt.
Unn wenn mer dann noch kommentiere konn,
jo donn...

Donn brauchste ä Fell, eher ä Digges,
weil nitt jeder konn lese, aaach nitt beim Strickes.
Do werd dann geheuchelt, wie scheeee, ei wie schick
und werst grad gemeuchelt, wenn de schreibst: dess macht awer dick.
Do fillt sich de Briefkaste bei dir dann deham,
do werste bedroht, ganz ohne Scham...

Unn wenn er donn kimmt, de Internettdroll,
der schreibt anonym, duht soi Moinung frech kund,
do sollste emol gucke, wie schnells geht donn rund.
Dodebei duht mer den Droll am beste vertreibe,
wenn mer duht gar nitt beachte sei Schreibe.
Stattdesse werd der gefittert, liebkost und gestreichelt,
geknuddelt, beduddelt un wischtisch gemacht.
Ei losst en doch verhungern, donn habt ern am Schnellste geschafft.

Uff de onnern Seit, ich wills nitt verhehle,
iss es ach wichtig zu lese zu welcher Seit mer duht zehle,
weil, des iss tüppisch deitsch, schee sauber gegliedert,
schreibste beim ahne werste vun de annern geteert un gefiedert.

Duhste dei Moinung dann ehrlich kund,
fillt er sich wierer - doin Kaste - diesmo mit Schund.

Isses donn so schwer, ich kanns nitt begreife,
braucht es des werklich, all des Gekeife?
Muß donn werklich jeder mit jedem verschwistert glei soi,
gehts nit ach annerst, was wär des so foi.
Muß gleich jeder emm onnern soin Freund sein,
is dass dann immer so, ich mein jetzt daheim?
Werd do ach gleich vun jedem geschriewe,
dess iss moin Freund, nitt iwwerdriwe.
Wenn dem so ist ihr Leit,
donn froch ich euch ernsthaft womit befasst enn Richter sich heit?
Do gehts doch um Zäune, um Bähm ums Kehrn unn ums Parke geht oft um Bledsinn - korz um viel Mores,
ei gug doch emo hie, do machste gleich Aache, weil gewinne duht weje eierm Bledsinn ess richtische Zores.

Besinnt euch emol uff euer Erziehung,
setzt Hern oi, ach in de Internetbeziehung.

Kommentiert ehrlich, losst euer e-mail addi gleich do,
dann muß mer net forsche noch de Eipie unn so.

So, nun iss hier genug davon geschriewe,
noch viel mehr wär grad iwwerdribbe
Zum nochdenke longst, do isses genuch.
ess werd eh so moncher vorm Monitor hocke,
mim truckene Hals un em dicke Brocke.

Es iss Fassenacht, Fasching, Karnevalszeit,
do zieh ichs gern o, ess Narrenkleid.
Ich geh jetzt enaus, geh uff die Gass,
ins richtische Lewe, mach mer dort moin Spaß.
Mensch geht doch mit, lebts richtische Lewe,
ihr misst nit die gonz Zeit im Internet klewe.

Fahrt den Kaste emol enunner,
am beste zieht en Stecker ennaus,
geht unner die Leit, vergesst eiern Kummer,
und glei sieht die Welt ganz annerst aus.

Unn wenn ers beherzicht, was ich Gedicht,
donn gibt es ko Zittergesicht,
dann macht euch des gar nix aus, wenn ihr dann feststellt:
Das ess Internet iss ä glasisch Haus.

HELAU.